نجی ٹی وی کے مطابق صوبائی کابینہ کی جانب سے منظوری کے بعد ستھرا پنجاب پروگرام کے تحت کوڑا ٹیکس لاگو کیا گیا ہے۔

گھروں سے کتنا ٹیکس وصول کیا جائے گا؟

منصوبے کے تحت شہری علاقوں میں پانچ مرلہ گھر پر 300 روپے جبکہ دیہات میں 200 روپے کوڑا ٹیکس لگایا گیا ہے، شہروں میں پانچ سے دس مرلہ کے گھر سے 500 روپے جبکہ دیہات میں فکس 200 روپے وصول کیے جائیں گے۔

اسی طرح 10 مرلہ سے ایک کنال والے گھر پر ایک ہزار جبکہ دیہی علاقوں میں 400 روپے کوڑا ٹیکس وصول کیا جائے گا جبکہ دو سے چار کنال والے گھر سے ماہانہ دو ہزار روپے ، چار کنال سے اوپر والے گھر سے پانچ ہزار روپے کوڑا ٹیکس لیا جائے گا جبکہ دیہی علاقوں میں دو کنال سے اوپر والے گھروں سے ماہانہ 400 روپے کوڑا ٹیکس لیا جائے گا۔

دکانداروں اور دفاتر کا ٹیکس

شہری علاقوں میں چھوٹے دکانداروں سے 500 روپے جبکہ دیہی علاقوں میں 300 روپے، شہروں میں درمیانے درجے کے دکانداروں سے ایک ہزار روپے جبکہ دیہاتوں میں 700 روپے کوڑا ٹیکس وصول کیا جائے گا۔

اسی طرح بڑے کاروباری مراکز سے ماہانہ تین ہزار جبکہ دیہاتوں میں دو ہزار روپے کوڑا ٹیکس لیا جائے گا۔

لاہور ویسٹ مینجمنٹ کمپنی ( ایل ڈبلیو ایم سی )نے باقاعدہ کوڑا ٹیکس کے بلوں کی تقسیم شروع کردی ، بلوں کی تقسیم و وصولی ایل ڈبلیو ایم سی کی ریونیو اور آپریشنل ٹیم کرے گی۔