پنجاب حکومت نے طلبہ کے لیے مفت لیپ ٹاپ سکیم کے دوسرے مرحلے کا اعلان کر دیا جس کا مقصد طلبہ کو پنجاب بھر میں ڈیجیٹل لرننگ ٹولز تک رسائی کو مزید توسیع دینا ہے۔
ہائر ایجوکیشن ڈیپارٹمنٹ کی جانب سے بتایا گیا کہ مفت لیپ ٹاپس کی تقسیم کا آئندہ ماہ ستمبر سے ہو گا اور میرٹ کو فوقیت دی جائے گی، لیپ ٹاپ سکیم کے دوسرے مرحلے کا باضابطہ شیڈول بھی تیار کر لیا گیا ہے۔
وزیراعلیٰ پنجاب مریم نواز مفت لیپ ٹاپ سکیم کے دوسرے مرحلے کا افتتاح ستمبر کے پہلے یا دوسرے ہفتے میں کریں گی۔
واضح رہے کہ لیپ ٹاپ سکیم کے پہلے مرحلے میں صرف صوبائی دارالحکومت لاہور کے طلبہ کو 14 ہزار لیپ ٹاپس فراہم کیے گئے تھے جبکہ دوسرے مرحلے میں اس سکیم میں توسیع کی جا رہی ہے تاکہ صوبے بھر کے مزید مستحق اور باصلاحیت طلبہ اس سہولت سے مستفید ہو سکیں۔
یاد رہے کہ وزیراعظم شہباز شریف نے بھی ہونہار نوجوانوں کو میرٹ کی بنیاد پر ایک لاکھ مفت لیپ ٹاپس فراہم کرنے کا اعلان کیا تھا۔
نوجوانوں کے عالمی دن کے موقع پر تقریب سے خطاب کرتے ہوئے وزیراعظم شہباز شریف نے کہا تھا کہ مفت لیپ ٹاپس چاروں صوبوں، وفاقی دارالحکومت، گلگت بلتستان اور آزاد کشمیر میں میرٹ پر تقسیم کیے جائیں گے، یہ لیپ ٹاپ سود پر مبنی قرضوں کے ذریعے لیپ ٹاپ کی سکیم کے علاوہ ہوں گے۔
